سرکار کی جانب سے جاری کردہ ہدایت میں بتایا گیا کہ عوامی مقامات پر آواز کی سطح ۱۰؍ ڈیسیبل تک ہی محدود ہوگی، خلاف ورزی کرنے پر بھاری جرمانہ عائد ہو گا

اتر پردیش کے بعد اب دہلی میں بھی لاؤڈاسپیکر کے استعمال سے متعلق سخت ہدایات جاری کی گئی ہیں۔ دہلی پولیس نے لاؤڈاسپیکر کے  لئے نئے اصول جاری کئے ہیں  جن کے مطابق مذہبی مقامات سمیت سبھی جگہوں پر مقررہ ڈیسی بل (ڈی بی) حد پر عمل کرنا لازمی ہوگا۔ ساتھ ہی بغیر اجازت لاؤڈاسپیکر کا استعمال ممنوع قرار دیا گیا ہے، جس کی خلاف ورزی پر سخت جرمانہ لگایا جائے گا۔نئے اصولوں میں صنعتی، رہائشی اور سائلنٹ زون کے  لئے الگ الگ صوتی حدیں مقرر کی گئی ہیں۔ ٹینٹ ہاؤس سے بھی لاؤڈاسپیکر لینے کیلئے پولیس کی اجازت لازمی ہوگی۔
  پولیس کے ذریعہ جاری ہدایت میں بتایا گیا ہے کہ عوامی مقامات پر آواز کی سطح زیادہ سے زیادہ ۱۰؍ ڈی بی تک ہی محدود ہوگی۔ ذاتی ملکیت والے صوتی سسٹم کی آواز مقررہ حد ۵؍ ڈی بی سے زیادہ نہیں ہونی چاہیے۔ ہدایت میں انڈسٹریل ایریا میں صبح ۶؍ بجے سے رات ۱۰؍ بجے تک ۷۵؍ ڈی بی آواز کی اجازت اور رات ۱۰؍ بجے سے صبح ۶؍بجے تک ۷۰؍ ڈی بی آواز کا پیمانہ طے کیا گیا ہے۔ اس کے علاوہ رہائشی علاقوں میں صبح ۶؍ بجے سے رات ۱۰؍ بجے تک ۵۵؍ ڈی بی آواز کی اجازت ہوگی  اور رات ۱۰؍ بجے سے صبح ۶؍ بجے تک ۴۵؍ ڈی بی آواز کی سطح مقرر کی گئی ہے۔
  سائلنس زون میں صبح ۶؍بجے سے رات ۱۰؍بجے تک ۵۰؍ڈی بی آواز کی اجازت ہوگی، جبکہ رات ۱۰؍ بجے سے صبح ۶؍بجے تک آواز کی حد ۴۰؍ ڈی بی مقرر کی گئی ہے۔دہلی پولیس کے ذریعہ جاری حکم میں کہا گیا ہے کہ سبھی ٹینٹ، لاؤڈاسپیکر اور جنریٹر فراہم کرنے والوں کو واضح ہدایت دی جاتی ہے کہ وہ مقامی پولیس کی تحریری اجازت کے بغیر صارفین کو سامان نہ دیں۔دہلی پولیس نے اصول توڑنے والوں کے لیے جرمانہ بھی طے کیا ہے۔ لاؤڈاسپیکر پبلک ایڈریس سسٹم کے نامناسب استعمال پر۱۰؍ ہزار روپے کا جرمانہ اور سامان کی ضبطی ہوگی۔ اس کے بعد جرمانے کی رقم بڑھتی جائے گی۔